Sas primas domos in su territòriu apartenint a su periudu Prenuràgicu comente est atestadu fintzas dae sas Domos de Janas chi s'agatant in Sas Ischinas e dae sas presèntzias de materiales de Cultura de Otieri.
    Fiat abitadu fintzas in su periudu Nuràgicu e sunt medas sas testimoniantzias archeològicas: infatis in su territòriu b'at Nuraghes medas e Tumbas de Gigantes.
     Sa leada est istada travigada de seguru fintzas in su periudu Romanu, mancari non b'epant testimoniantzias bene definidas. Ancora ismentigadas sunt sas credèntzias ligadas a Santos Orientales, testimoniant sos ligames de sas populatziones de su logu cun sos matessis Bizantinos.
     In su Medioevu Bono aparteniat a sa Curadoria de su Goceanu e a custu periudu faghent parte palatos medas de cresia: sa testimoniantzia prus antiga est sa Cresia de Sant'Ainzu a Lortzia, in istile Romànicu e particulare pro sa fraigadura in matones.